BAGUIO CITY – Nailista ti kaunaan a kaso ti rabis iti aso sadiay Tabuk City, Kalinga ita a tawen.
Sigun kenni Dr. Carmen Wanas, Assistant City Veterinarian ti Tabuk City, ti nasao nga aso ket one-month old a labrador a ginatang ti maysa a residente ti Purok 3, Bulanao Norte manipud sadiay Burgos, Isabela idi Enero 4.
Kinunana a manipud inyawid ti nasao nga indibidual ti ginatangna nga aso wenno idi Enero 5-7 ket liman a tattao ti kinagat daytoy.
Naduktalan a dua nga aldaw sakbay a natay ti nasao nga aso idi Enero 8 ket nakitaan daytoy kadagiti sintomas a panagbakwar, awan ganaygayna a mangan, awan rason a kina-agresibo, alerto, saan a makaidna ken killaat lattan a panagkagat.
Naipaima met iti City Veterinary Office ti ulo ti nasao nga aso idi aldaw a natay daytoy ken naisumitir iti Regional Animal Disease Diagnostics Laboratory ti Department of Agriculture – Region 2 para iti eksaminasyon.
Nakumpirmar met idi Enero 12 a naimpeksion iti rabis ti specimen wenno ti ulo ti natay nga aso.
Naibalakad metten ti panakaipasidong iti kompleto a post exposure treatment iti Tabuk City Health Office dagiti kinagat ti nasao nga aso.
Insayangkat pay ti City Veterinary Office ti Tabuk City ti disinfection ken anti-rabies vaccination iti sumagmamano nga aso iti nakapasamakan ti insidente tapnu malapdan ti panagwaras ti rabis sadiay.
Maipalagip a nasken a tallo a bulan ti aso sakbay daytoy a mabakunaan kontra iti rabis isut gapuna a maibalbalakad a nasken a maipabakuna ti breeder stock wenno dagiti inna nga aso tapnu maipasigurado ti kinatalged dagiti annak dagitoy manipud iti rabis. //Tabuk City Kalinga
