BAGUIO CITY – Posible a sumango ti maysa a kompanya ditoy Baguio iti kaso a panaglabsing iti entry protocols kalpasan a nagpastrekda kadagiti trabahador a saan a dimmalan iti umno a proseso.
Sigun kenni Mayor Benjamin Magalong, 25 a construction workers manipod sadiay Mountain Province ti nakastrek iti Beckel checkpoint tapno makapagtrabaho ditoy siudad.
Gapu iti daytoy, dagos a naiturong dagiti nasao a trabahador iti central triage tapno maipasidong iti test.
Kinunana nga iti agdama ket im-imbestigaran ti lokal a gobierno ti nasao a kompanya a nangpastrek kadagiti trabahador nga awanan ti kaskenan a dokumento.
Sigun pay kenkuana, naduktalan iti imbestigasyon a nagkurang dagiti personnel ti Baguio City Police Office (BCPO) Station 3 nga agbanbantay iti Beckel checkpoint.
Gapu iti daytoy, dagos nga inyuman ni Mayor Magalong kenni BCPO City Director, PCol. Glenn Lonogan ti nasao a pakaseknan a nangitunda iti dagos a panangikkatna iti pwesto iti Station Commander ti BCPO-Station 3.
Inyunay-unay manen dagitoy a nasken a dumalan iti umno a proseso dagiti amin travellers nga agturong ditoy siudad ti Baguio.
