BAGUIO CITY – Sumangsango ita iti kaso a panagtakaw ti maysa a lalaki kalpasan a nakemmeg gapu iti panagdukotna iti nginginaen a cellphone sadiay deppaar ti Session Road, Baguio City idi kalman.
Nabigbig daytoy a ni Jay-ar Odiong Mitay, 27-anyos ken residente ti Purok 4, Gabriela Silang, Baguio City.
Nabigbig met ti biktima a ni Prismiley Ann Tanedo, 19-anyos ken residente ti Purok 1, Brookside, Baguio City.
Maibasar iti imbestigasyon ti pulisya, sinurot ti suspek ti magmagna a biktima iti deppaar ti Session Road kalpasan a nadlaw ti suspek ti cellphone ti biktima a nakakabil iti kanawan a bulsa ti jacket-na.
Inala ti suspek ti cellphone ti biktima nga aggatad iti nasurok P50,000.
Nabigbig met ni Mitay babaen iti tulong ti video footage ti CCTV camera a naimuntar iti asideg ti nakapasamakan ti panagdukot a nangitunda iti panakakemmeg daytoy.
