BAGUIO CITY – Makaaw-awat iti pammadayaw ita ti balasitang nga estudyante gapu iti panangalana ti video ken ladawan iti panangmolestiya ti maysa a chess coach iti biktima nga ubing a babae ditoy Baguio City idi kalman.
Sigun kenni Col. Allen Rae Co, acting city director ti Baguio City Police Office, gapu iti napartak nga aksion ni JM Madinno ket naamuan ti panangmolmolestiya ti suspek iti biktima a nagresulta iti dagus a panakakemmegna.
Nabigbig ti suspek a ni Ramsey Tiwaken, 33-anyos, baro, chess coach ken residente ti Ambassador, Tublay, Benguet bayat a ti biktima ket 10-anyos a balasitang.
Naamuan a ti suspek ket lima a bulanen a coach ti biktima iti chess.
Immuna nga in-video ti balasitang ti panangmolestiya ti suspek iti biktima bayat nga addada iti uneg ti jeep a paturong ditoy Baguio manipud La Trinidad, Benguet.
Nakita manen ti balasitang ken dagiti kakadwana ti suspek ken ti biktima sadiay Burnham Park ken ditoy a nasaksianda manen ti panangig-iggem ti suspek kadagiti pribado a paset ti biktima bayat a makumikom daytoy iti cellphone.
Dagus nga inalaan manen ni Madinno iti ladawan ti suspek sakbayna nga impablaak dagitoy iti social media ken nagreport iti istasyon ti pulisya.
Nagresulta daytoy iti panakakemmeg ti suspek sadiay Igorot Park.
Sumangsango ita ti suspek iti kaso a panaglabsing iti RA 7610 wenno child abuse.
