BAGUIO CITY – Binalasa ti Police Regional Office Cordillera (PROCOR) ti liderato iti pulisya ti Bangued, Abra tapnu mapukaw ti aniaman a panagdudua iti panagbalin a bias dagiti pulis kagiddan ti umadani a midterm elections.
Kabayatan ti panakaiyusuat manen ti Abra Shield, nadutukan ni Police Major Daniel Bandoc kas hepe ti Bangued PNP kasukat ni Police Major Dominador de Guzman.
Nadutukan met ni Police Major Lory Parrazona kas dadaulo ti inter unit ti Bangued PNP kasukat ni Police Lt. Col. Crisante Sadino.
Agsubli ni De Guzman iti regional office bayat a ni Sadino ket maiyakar iti Mt. Province PNP.
Sinukatan pay ti 1504th Regional Mobile Force Battalion a sigud a nakabase sadiay Ifugao ti 180th Regional Mobile Force Battalion a sigud a nakabase sadiay Abra.
Kagiddan iti daytoy, impalagip ni Dickson kadagiti pulis sadiay Abra ti panagbalinda a non-partisan bayat ti eleksion tapnu awan ti tumaod a parikut ken awan ti madusa kadagitoy.
Inyunay-unayna ti kinapateg ti panangpatalinaed ti pulisya iti talek ken kumpiyansa ti publiko iti organisasyonda para iti nakappia, natalinaay ken napudno a basingkawel.
