BAGUIO CITY – Ad-adalen ita ti city council ti linteg maipapan iti pannakaipatungpal ti liquor ban iti Baguio City.
Kasaruno daytoy ti pannakaipaay ti special permit kadagiti sumagmamano nga establishemento nga agpaut laeng iti nabiit ngem saan nga agtungtungpal dagitoy.
Iti interview ti Bombo Radyo kenni City Councilor Ma. Mylene Victoria Yaranon, saanda nga ummannamong iti special permit a maipapaay kadagiti bar establishments iti siyudad.
Kinunana a maipapaayan ti special permit dagiti establishemento a naglabsing tapno makabirukda ti baro a pagpwestoan wenno umakaran dagitoy.
Nupay kasta, dinakamat ni Yaranon nga adda dagiti abusado nga establishemento a saan pailaeng nga agtultulnog iti nasao a pagalagadan.
Gapu iti daytoy, impettengna a rumbeng a maaddaan ti ‘time limit’ ti special permit partikular dagiti asideg kadagiti school premises.
Namnamaen met ni Yaranon a saanen a marenew dagiti naipaayanen ti special permit nga ag-operate.
Kabayatanna, awan met ti ‘hotspot area’ a nailista ti Baguio City Police Office iti agdama nu di ket isolated incident laeng.//Marinel Rodrigo
