Nagduduma a livelihood products nga inaramid dagiti Persons Deprived of Liberty (PDL) iti La Trinidad Municipal Jail ti mabalin a magatang iti Strawberry Lane sadiay Tabanda Park, Km. 5 La Trinidad, Benguet kagiddan ti manarimaan nga Strawberry Festival.
Dagiti produkto a mabalin a magatang ket pakairamanan iti bayong,pungan,strawberry-flavored dish washing soap, pot holders ken rags.
Iti panakiuman ti Bombo Radyo kenni Senior Jail Officer 1 Rhodalyne Abad, Welfare and Development Officer iti nasao a pasilidad, ti panangilakoda iti produkto dagiti balud ket maysa a wagas ti panangiyam-ammoda iti komunidad dagiti produkto dagiti PDL bayat ti kaadda dagitoy iti uneg ti pagbaludan.
Innayonna pay a babaen iti daytoy ket matulungan dagiti balud a makapagsagana kaspangarigan mawaya-wayaanda.
Maaw-awis met dagiti interesado a mangsuporta iti nasao a panagregget iti La Trinidad Municipal Jail a gumatang kadagiti maidiay-diaya a produkto kadagiti pwestoda sadiay Strawberry Lane a manipod 8:00 iti agsapa agingga 5:00 iti malem.
Dagiti pot holder ket agbalor iti PhP10, PhP300 met ti bayong nga addaan iti strawberry design, PhP450 dagiti daddakel a bayong, PhP500 dagiti bayong a daddakkel nga addaan iti strawberry design, PhP35 ti dishwashing liquid,bayat nga agay-ayam met iti PhP150 agingga PhP350 ti presyo ti pungan.
Kabayatanna, naobserbaran met nga awanen dagiti mailaklako a keychains gapu ta dagiti balud a mangar-aramid kadagiti nasao a produkto ket nawaya-wayaanen sigun kenni SJO1 Abad.//Bombo Genzel Depayso
