BAGUIO CITY – Inkalintegan ni Baguio City Police Office (BCPO) ti iseserrek ditoy Baguio City ni Philippine National Police (PNP) Chief Archie Gamboa ken ti entourage daytoy.
Sigun kenni City Director P/Col. Allen Rae Co, kompleto ti travel documents da Gamboa ken dimmalan dagitoy iti triage procedures sakbayda a nakastrek ditoy siudad.
Dinakamatna nga amin a kakadwa ni Gamboa, pakairamanan daytoy ket nagrehistro iti Returning Baguio Residents (RBR) website.
Sigun kenkuana, maipaayan kuma iti testimonial parade sadiay Philippine Military Academy ni Gamboa ngem saanen a natuloy gapu iti agdama a pandemya.
Maibasar iti rekord ti BCPO, nakadteng ditoy Baguio da Gamboa idi rabii ti Huwebes, August 13 bayat a ti testimonial parade ket idi kuma Sabado, August 15.
Innayonna a kinissayan pay ti PNP Chief ti bilang ti aldaw a panagtalinaedda ditoy siudad.
Maipalagip a ni Gamboa ket miyembo ti PMA ‘SINAGTALA’ Class of 1986 ken naituding nga agretiro inton September 2.
Nupay kasta, napagsaritaan iti social media ti maatap a pribado a pasken iti Chief PNP Cottage sadiay Navy Base ken adda pay ti banda a nagtukar malaksid iti maatap a panakalabsing ti curfew hours.
Impetteng met ni PCol. Co a ti napasamak ket pribado a dinner para kadagiti opisyal.
Kinunana pay a nakipatang ni Gamboa kenni Baguio City Mayor Benjamin Magalong ken kadagiti opisyales ti Police Regional Office Cordillera tapno pagsaritaan ti agdama a sitwasion ti siudad ken ti rehion Cordillera.
Immuna metten a pinaglibakan ni PNP Chief Gamboa ti nasao nga alegasyon.
