BAGUIO CITY – Maim-imbestigaranen ti maatap a panangdangdangran ti maysa a konsehal ti Dolores, Abra iti maysa a pulis gapu laeng iti panangpalagipda kenkuana ken kadagiti kakadwana seknan iti curfew hours idi rabii ti Biyernes, Enero 1.
Nabigbig ti opisyal a ni Councilor Russ Marion Zapata bayat a nabigbig ti biktima a ni Patrolman Lowie Gie Itchon.
Maibasar iti report ti Abra Police Provincial Office, immuna a pinalagipan ni Patrolman Phoebe Chumanao ni Councilor Zapata ken ti kadwa daytoy seknan iti curfew hours sadiay Dolores ngem kinarit ti konsehal ti nasao a pulis isut gapuna a pimmanaw laengen ti pulis.
Nagpatrolya manen da Patrolman Itchon ken Patrolman Chumanao ken ditoy a nakitada ti grupo da Coun. Zapata iti maysa a pancitan ken sadiay a pinalagipanda manen dagitoy iti curfew hours.
Imbes nga agawid, dagus a dinarup ni Coun. Zapata ni Patrolman Itchon iti tulong ti managan Jaja Turqueza ken dadduma a kakadwa dagitoy.
Ingeman ken impatalikodda ti dua a takkiag ni Patrolman Itchon ken dinanogda ti rupa daytoy ken dadduma a paset ti bagina malaksid a pwersado nga inasot ti managan Jong Jong Turqueza ti paltog ni Patrolman Itchon.
Gapu iti daytoy, nagsagrap ti pulis iti dunor iti kiday ken pingping ken panagsakit iti barukong.
Nainget met a kinondinar ni Police Regional Office Cordillera regional director PBGen. R’Win Pagkalinawan ti inaramid ti nasao a nabotosan nga opiosyal.
Gapu iti daytoy, imbilinnan ti panangtulong ti legal service ti Cordillera Police iti Abra Police Provincial Office para iti panakaipila ti kaskenan a kaso kontra kenni Counc. Zapata ken kadagiti kakadwa daytoy.
