Kinumpirmar ni House Secretary General Reginald Velasco nga adda ti manamnama a maipila a maika-uppat nga impeachment complaint kontra kenni Vice President Sara Duterte.
Iti maysa a mensahe ni Velasco, adda ti sumagmamano a kameng ti House of Representative ti nagkiddaw ti extension wenno pannakailaylayon gaputa ad-adalen dagitoy a mangipila ti maysa pay a reklamo.
Sigun iti House Secretary General, dumanon iti sangapulo agingga sangapulo ket dua a kameng ti House of Representatives manipod iti majority ken minority blocs ti nangibaga a panggepda a mangipila ti maikapat nga impeachment complaint.
Nagkedked met ni Velasco a naganan dagiti nasao a Kongresista.
Inlawlawag ni Velasco a nu adda man ti mangipila ti maikapat nga impeachment complaint inton Lunes, Enero a siete ket dagosna nga ire-refer kenni Speaker Martin Romualdez wenno i-delayna daytoy.
Innayon pay ni Velasco a ti maikapat a reklamo ket i-referna iti Legal Department ti Kamara tapno maadal daytoy.
Iti agdama, adda ti tallo nga impeachment complaint a naipila iti Kamara kontra kenni Vice President Sara Duterte.
