BAGUIO CITY – Nakemmeg ti mabigbigbig a maikadua a top most wanted person – municipal level ti Itogon PNP sadiay Bangcusay, San Fernando, La Union idi kalman.
Nabigbig daytoy a ni Antonio Pulido Jr., 54-anyos, naasawaan, minero, tubo ken residente ti Bangcusay, San Fernando, La Union.
Nakemmeg daytoy babaen iti bileg ti warrant of arrest nga impaulog ni Presiding Judge Marrietta Brawner Cualing ti Regional Trial Court – Branch 9, 1st Judicial Region, La Trinidad, Benguet.
Sumangsango ni Pulido Jr. iti kaso a panaglabsing iti RA 9262 wenno ti Anti-Violence Against Women and their Children Act of 2004 nga addaan piyansa a P120,000.
Sigun kenni PMajor Rommel Sawatang, hepe ti Itogon PNP, ti biktima ti nasao nga indibidual ket ti mismo nga asawa daytoy.
Inserbi ti nagtipon a pwersa ti Itogon PNP, nagduduma a provincial unit ti Benguet PNP ken ti San Fernando City Police Station ti warrant of arrest ti nasao nga indibidual.
