BAGUIO CITY – Dumakdakkel ti utang ti PhilHealth-Cordillera kadagiti sumagmamano a pagagasan ditoy siudad ti Baguio a nangitunda iti nabuntogen a panakaiproseso dagiti claims.
Immunan nga inwaragawag ni Mayor Benjamin Magalong a dumanonen iti nasurok P100-M ti utang ti PhilHealth kadagiti pagagasan ditoy Baguio a bukbuklen ti P33-M iti SLU Hospital of the Sacred Heart, P42-M iti Notre Dame Hospital ken P30-M iti Pines City Doctor’s Hospital.
Iti baet daytoy, kinuna ni Dr. Glenn Lamsis, Officer-in-Charge ti Health Care Delivery Management Division ti PhilHealth-Cordillera nga agtultuloy ken manarimaan ti reimbursement dagiti COVID-19 related claims.
Inlawlawagna a nasken a dumalan iti umno a proseso dagiti claims ken ditoy a naipaayan dagiti pagagasan iti 60 nga aldaw a mangisubmitir ti claims bayat a naipaayan metlaeng ti PhilHealth ti 60 nga aldaw a mangiproseso kadagiti nasao a claims.
Inaklonna a nabuntog laeng ti panakaiproseso dagiti claims gaputa saan pay a perpekto ti claims processing ken ti panangisumitir kadagiti claims nangruna ta manual ti immuna a panangisumitir dagiti pagagasan kadagiti COVID-19 claims.
Nupay kasta, impanamnamana a napartak itan ti panakaiproseso dagiti nasao a claims gaputa electronics itan ti ar-aramaten ti PhilHealth-Cordillera ken iti agdama ket maipoproseson ti 16 a claims ti nagduduma a pagagasan ditoy siudad.
Imbinglayna pay nga iti agdama ket addan ti nabayadan ti PhilHealth nga agarop P50-M a bukbuklen ti P30-M kadagiti pagagasan ken P22-M kadagiti community isolation units.
