BAGUIO CITY – Agtultuloy ti panangpalagip ti Public Order safety division- Baguio (POSD) kadagiti boat concessionaires iti burnham lake nga agtulnogda iti mandatory use of life vest ordinance.
Iti interview ti Bombo Radyo kenni Public Order safety division- Baguio Chief Daryl Kim Longid, kaadoan kadagiti boat concessionaires ket namulta gapu ta saanda a pinagsuot ti life vest dagiti kustomer dagitoy.
Sigun kenni Longid, responsibilidad dagiti boat concessionaires nga ipaaramat dagiti life vest kadagiti kustomerda tapnu masalakniban dagitoy nu adda ti mapasamak nga aksidente.
Dinakamatna pay nga ada ti personnelda nga agbambantay tunggal aldaw tapnu mapalagipan dagiti boat concessionaires maipapan iti panangsurotda iti nasao nga ordinansa.
Impaganetgetna a nu adda dagiti kustomer a saan a mangkayat a mangaramat ti life vest ket nasken nga ilawlawag dagiti boat concessionaires a makanselar ti permitda nu saanda nga agtulnog.
Kabayatanna, awan met ti nailista nga aksidente iti burnham lake malaksid laeng idi napalabas a Marso ti agdama a tawen nu sadino walo nga indibidual ti naitaray iti ospital kalpasan a nabaliktad ti naglugananda a bangka.
Iti agdama, agarup walo a boat concessionaire ti agpapaabang iti burnham lake.//Raz
