BAGUIO CITY – Saan a makipaset ti Manibela Transport Group – Baguio & Benguet iti mapangpanggep a tigil pasada inton Abril 29 agingga Mayo 1, iti agdama a tawen.
Iti interview ti Bombo Radyo kenni Rogel Canao, Chairman ti Manibela Transport Group – Baguio & Benguet, panggepda nga ilawlawag kadagiti drivers ken operators nu anya ti mapasamak kalpasan ti consolidation ken ti panagkaykaysa dagitoy iti corporation.
Sigun kenkuana, panggepda nga ipakaammo iti opisyales iti Land Transportation Franchising and Regulatory Board (LTFRB) ken Department of Transportation (DOTr) a denggenda ti arungaing ti transport group iti rehiyon Cordillera gapu ta saan nga agpada ti sitwasyon dagitoy iti National Capital Region.
Kinunana a nu mabalbalin ket mailaksid dagitoy gapu ta sabali ti terrain iti rehiyon.
Nupay kasta, kinuna ni Canao a makisarita pay iti counterpart group dagitoy a PISTON maipapan iti plano ti grupo dagitoy seknan iti umadanin a deadline ti consolidation.
Kabayatanna, pagamkan dagiti operator ken drivers ti panakaawan ti panggedan dagitoy gapu ta uray nakapagconsolidate ket saan a mailaksid iti phase-out nu saan nga agsukat iti modern jeepney.
Namnamaen met ni Canao nga adda pay ti pamusmusan tapno maipakammo iti national agencies ken offices para iti panakailaksid dagiti napipintas nga units wenno lugan iti rehiyon Cordillera.//Bombo Marinel Rodrigo
