BAGUIO CITY–Kiniddaw ni Mayor Benjamin Magalong ti panakabalanse ti ekonomiya ken salun-at dagiti umili ti siudad kagiddan ti plano a panakaipasidong manen ti Cordillera Region iti General Community Quarantine (GCQ).
Kinunana a napateg nga adalen pay ti COVID-19 Inter-Agency Task Force ti sasaaden ti rehion nangruna ti agtultulloy a panangato ti kaso ti COVID-19 ken ti nakastreken a UK variant ti nasao a sakit.
Sigun kenkuana, saan koma a killaat nga agdesisyon ti task force seknan iti nasao a plano gaputa nasken a makonsukta dagiti lokal a gobyerno iti rehion.
Maipalgip nga agingga ita ket awan pay ti kumpirmasyon manipud kadagiti maseknan nga otoridad no maipasidong ti Cordillera iti GCQ ngem manamnama a maamuan ti desisyon iti plano intun Pebrero 1.
Kabayatanna, kitkitaen paylaeng ni Mayor Magalong ti panakairteng manen ti paglintegan iti border control checkpoints iti nagbaetan ti Baguio, La Trinidad, Itogon, Sablan, Tublay ken Tuba wenno BLISTT area.
Impettengna a saanen a health declaration form ti kasapulan ngem ketdi Medical Certificate para kadagiti umili ti La Trinidad a sumrek iti Baguio nangruna ita nga addan ti presensia ti UK Variant iti nasao a munisipyo.
Innayonna a posible a maipatungpal daytoy a paglintegan kadagiti dadduma a munisipyo iti BLISTT area iti kanito nga agtultuloy ti panagwaras ti UK variant.
