--Ads--
BAGUIO CITY – Natiliw ti maysa a drug personality iti buy-bust operation nga insayangkat dagiti otoridad iti maysa a beauty parlor sadiay Kayang Hilltop, Baguio City idi rabii.
Nabigbig daytoy a ni Erickson Gracia Fernandez, 26-anyos, baro, porter ken residente iti Lower Cabinet Hill, Baguio City.
Nakalista daytoy kas maysa nga street level individual iti illegal drug trade.
Kabayatan ti operasyon, nakumpiskar kenni Fernandez ti dua a pakete ti maatap a shabu nga agdagsen ti 5.5 grams.
Nakumpiskar pay ti cellphone nga inaramatna a nakitransaksion iti operatiba bayat a narekober iti ikotna ti naaramat a buy-bust money.
Sumangsangon daytoy iti kaso a panaglabsing iti RA 9165 wenno ti Comprehensive Dangerous Drugs Act of 2002.
