Nadangran ti maysa a lalaki, 20-anyos, ken residente ti Andres Bonifacio, Baguio City kalpasan a dinangran ti padana a lalaki nga agtawen met ti 21 a residente ti Camp 8, Baguio City.
Sigun iti biktima, bayat nga adda daytoy iti uneg ti sinehan iti kadakkelan a mall iti siudad, kaduana ti gagayemna, dinillawna ti suspek gaputa naariwawa daytoy ken gapu iti panag-vape-na.
Naka-unget ti suspek ngem saan nga inkankano ti biktima.
Idi nakaruar dagitoy iti mall ken nakastrek ti biktima iti uneg ti luganna, kaduana ti maysa kadagiti barkadana, kellaat nga inguyud ti suspek ti biktima ken karkaritenna nga aglaban dagitoy.
Apaman a bimmaba ti biktima manipod iti luganna, dagos a dinanug ti suspek ket natamaan ti pangana.
Gapu iti napigsa nga “impact” ti pannakadanugna, naulaw ken naawanan daytoy ti puot.
Kalpasan ti sumagmamano a minutos, nakapuot daytoy ken tinulungan ti gayyemna.
Dagosda met nga inreport ti insidente kadagiti otoridad, ket nai-refer ti kaso iti barangay.
Maibasar met iti medicolegal ti biktima, nagsagrap ti soft tissue contusion secondary to battery ti sumagmamano a paset ti rupa ti biktima.// via Bombo Noveh Organai
