Pimmusay ti maysa a lalaki kalpasan a nalmes sadiay Mangi Hydro River, Hydro 2, Nangalisan, Tuba, Benguet idi laeng kalman.
Nabigbig ti lalaki a ni John Lloyd Runatay Bautista, 18-anyos, ken residente sadiay San Cornelio, Caba, La Union.
Iti pannakiuman ti Bombo Radyo kenni Patrolman Edward Paul D Dao-ines, manipud Tuba Municipal Police Station, kinunana a maibasar iti imbestigasyon naglalangoy dagiti biktima ken dagiti innem a kakaduana iti alas 4 ti malem iti nasao a karayan kalpasan a nag-inomda iti dua a bote ti “2×2” nga arak.
Iti oras ti 5:30 ti malem iti kapada nga aldaw, ditoy metten a nalmes ti biktima gaputa saanna nga ammo nga aglangoy.
Dagos a nagkiddaw dagiti kakaduana kadagiti umili iti nasao a lugar rason a nagresponde dagitoy iti nakapasamakan ti nasao nga insidente.
Naipaayan metlaeng ti biktima iti Cardiopulmonary Resuscitation wenno CPR ken naiturong daytoy sadiay Baguio General Hospital and Medical Center para iti pannakatamingna.
Nupay kasta, indeklara ti attending physician daytoy a dead on arrival no sadino naduktalan a ti rason ti ipupusayna ket gapu iti severe asphyxia secondary to drowning.
Gapu iti daytoy, temporaryo a naiparekep kadagiti turista ti nasao a lugar agingga inton April 2025.
