BAGUIO CITY – Kinumpirmar ti Department of Health (DOH) ti positibo a kaso ti COVID-19 ditoy siudad ti Baguio, ti maikadua a kaso ti nasao a sakit iti entero a rehiyon Cordillera.
Sigun kenni DOH-Cordillera regional director Dr. Amelita Pangilinan, ti nasao a COVID-positive patient ket 61-anyos a babae a nagtaud sadiay Italy ken sinmangpet ditoy pagilian idi March 2.
Kinunana a nangrugi a marikna ti pasyente dagiti sintomas nga uyek, panateng ken sore throat idi March 7 ken nagpakonsulta idi March 13.
Dinakamatna a nagturong metlaeng ti nasao a pasyente sadiay Sablan ken Itogon, Benguet bayat a ti nabigbig a maysa a close contact ti nasao a pasyente ket tasymptomatic wenno saan a nakitaan ti aniaman a sintomas ti COVID.
Sigun pay kenni Dr. Pangilinan, nalpas metten ti contact tracing iti amin nga indibidual a nakapulapol ti nasao a pasyente ken amin dagitoy ket maipaspasidong iti quarantine.
Iti agdama, naka-admit ti nasao a pasyente iti Baguio General Hospital and Medical Center ken addan iti nasayaat a kondisyon.
Maipalagip a ti kaunaan a kaso ti positibo a COVID-19 ditoy Cordillera ket nailista sadiay Abra, babaen iti maysa nga OFW a nagtaud sadiay UAE ngem ita ket naimbaganen.
