BAGUIO CITY – Naideklara a persona non grata iti Barangay Dalican sadiay Bontoc, Mountain Province ti maysa kadagiti dadaulo ti rebelde a New People’s Army (NPA).
Iti barangay resolution, impeksa dagiti umili ti nasao a lugar a maiparit ti panagturong sadiay ni Simon Naogsan ken dagiti rebelde nga NPA.
Sigun kadagiti umili ti Barangay Dalican, daytoy ket gapu iti pammutbuteng ken panagriribuk nga ar-aramiden ti NPA ken ni Naogsan iti lugar dagitoy.
Kinunada a gangandaten dagiti rebelde a sukatan iti komunismo ken rebolusyonaryo a gobyerno ti kita ti panakaimaton ti lugar dagitoy.
Nainget met a tubtubngaren daytoy dagiti umili gapu kadagiti kinaranggas nga ar-aramiden ti CPP-NPA iti pagilian.
Inyunay-unay dagiti umili iti resolusyon a kayatda ti natalna ken nadur-as a panagbiag nga adayo iti impluwensia ti rebelde a CPP-NPA.
Dinayaw met ni Major General Laurence Mina, dadaulo ti 5th Infantry Division ti Philippine Army ti nagbalin nga addang dagiti residente ti Dalican, Bontoc.
Impettengna a ti aksion ket para iti napintas a masakbayan ti amin, nangruna dagiti agtutubo iti lugar dagitoy gaputa awanen ti lapped iti panakaidanon sadiay dagiti programa ken serbisyo ti gobyerno para kadagiti umili.
Impanamnamana pay nga aramiden ti militar ti mandatoda tapnu maipasigurado ti kinatalged ti amin nga umili kontra iti pangta ken impluwensiya ti rebelde a CPP-NPA.
