BAGUIO CITY – Agparparparikut ti maysa nga ina iti siyudad ti Baguio gapu iti amak daytoy a posible a mademolish ti pagtaengan daytoy gapu iti kinaawan ti building permit ti pagtaenganda.
Iti panakiuman ti Bombo Radyo kenni Maribel Dela Cruz Balayog manipud Iron Street, Upper Quezon Hill, impeksana a panggep laeng kuma ti pamilya dagitoy a kargaan iti linged wenno dingding ti extension ti agdama a pagnanaedanda ngem idi rugianda a tarimaan ti pagtaenganda ket kellaat a naipasardeng daytoy.
Sigun kenni Balayog, nagturong dagiti sumagmamano a personnel ti City Buildings and Architecture Office iti pagnanaedanda ken impakaamoda kenni Balayog nga adda ti concerned citizen a nangipakaammo iti opisinada nga awanan dagitoy kaskenan a building permit.
Gapu iti dayta, saan paylaeng a mabalin a matarimaan ti pagtaenganda Balayog iti laksid ti kinapeggad ti pagi-iyananda.
Innayonna pay nga iti naipatungpal a hearing iti CBAO, naammoanna a ti kaaruba daytoy ti nangireklamo kenkuana.
Saan a nagbayag ket natakuatan daytoy nga awanan metlaeng iti building permit ti kaaruba daytoy.
Kabayatanna, maibasar iti datos, agarup 75% a babbalay ken pasdek ti awanan iti building permit iti siudad ti Baguio.//Bombo Genzel Depayso
