BAGUIO CITY – Impaayen ti Land Transportation Franchising and Regulatory Board (LTFRB) ti Memorandum Circular a nangipalubos iti panagbiahe dagiti provincial buses nga agturong ken rumwar iti Baguio City.
Iti interview ti Bombo Radyo Baguio, imbinglay ni City Administrator Engr. Bonifacio Dela Peña a dua laeng a kompanya ti bus ti napalubusan nga agbiahe ditoy siudad paturong kadagiti sumagmamano a lugar ditoy Luzon.
Kinunana a mabalinen nga agbiahe dagiti nasao a kompanya apaman a malpas ti panangikabit ti LTFRB iti QR Code kadagitoy.
Dinakamatna a karaman kadagiti mabalin a pagturongan dagiti napalubusan a bus ket iti Manila, Benguet, Laoag, Ilocos Norte ken Pagudpud.
Inyunay-unayna met a maiparit ti walk-in ken nasken nga agpa-book dagiti aglugan kadagiti nasao a bus gaputa limitado ti bilang dagiti innaldaw nga agbiahe.
Kabayatanna, dinakamat ni Engr. Dela Peña nga awan pay ti pammalubos manipud LTFRB iti panagbiahe met dagiti UV Express Vans.
Nupay kasta, kinunana a no addan ti Memorandum Circular para iti daytoy ket dagus a masukimat dagiti nagaplikar para iti nasao a biahe ken no makapasa dagitoy kadagiti naituding a pagalagadan ket maipaayanda iti akreditasyon.
