Impaayanen ti House Committee on Justice iti notice wenno pakaammo dagiti miembro daytoy para iti panakairugi ti panakatingiting dagiti impeachment complaints kontra kenni Vice President Sara Duterte.
Mangrugi daytoy inton March 2 ken agleppas inton March 4.
Immunan nga impakaammo ni House Committee on Justice ken Batangas Represenative Gerville “Jinky Bitrics” Luistro nga umuna a kitaen ti komite nu adda ti umdas a porma ken linaon dagiti nasao a reklamo.
Iti umuna nga aldaw, matingiting ti porma ti reklamo ken kalpasan dayta ket dagus a matingiting ti linaon daytoy.
Kaspangarigan saan a malpas ket mabalin nga ituloyda daytoy iti sumaru nga aldaw ken uray nu naka-recess ti Kamara.
Impetteng ni Luistro a napateg a proseso ti impeachment rason a saan rumbeng a daytoy ket maitantan.
Maipalagip nga uppat nga impeachment complaints ti naipila kontra iti bise presidente a pakairamanan ti impila da France Castro et al.nga inyendorso dagiti representative a da Antonio Tinio, Sara Elago ken Renee Co; ti impila da Francis Dee et al. nga inyendorso dag Percival Cendaña ken Leila de Lima; ti impila ni Rev. Fr. Joel Sabalia et al. nga inyendorso metlaeng ni Leila de Lima; ken ti maikapat a reklamo nga impila met da Atty. Nathaniel Cabrera et al. nga inyendorso dagiti representative a da Bienvenido Abante Jr. ken Paolo Ortega V.
