BAGUIO CITY – Agtultuloy ti panagsawar ti tropa ti gobyerno iti nakapasamakan ti rinnupak iti nagbaetan ti 69th Infantry Battalion, Philippine Army ken dagiti kameng ti rebelde a New People’s Army (NPA) sadiay
Nagcanasan, Pilar, Abra idi malem kalman.
Iti eksklusibo nga interview ti Bombo Radyo kenni Lt.Col. Arcadio Posada, commanding officer ti 69th IB, PA, kinunana a pimmaut ti rinnupak iti agarup 20 a minutos a nangrugi iti agarup alas-1:15 ti malem.
Sigun kenkuana, nangisayangkat dagiti soldado iti internal security operation iti nasao a lugar kas panagrespondeda iti reklamo dagiti residente sadiay seknan iti panagbasakbasak dagiti rebelde nga NPA iti lugar dagitoy.
Dinakamatna nga immuna a pinalpaltogan dagiti rebelde dagiti soldado isut gapuna a bimmales dagitoy.
Pagyamyamananna met nga awan ti nadangran wenno pimmusay iti tropa ti militar.
Innayonna nga agtultuloy ti panagbantayda iti nasao a lugar tapnu maprebentaran ti panagraut wenno panagturong sadiay dagiti rebelde a grupo.
