Inladawan ti maysa a constitutional law expert a “useless” ti nabatbati a miembro iti nabukel nga Independent Commission for Infrastructure (ICI) para iti panakaimbestigar dagiti naanomalyaan a flood control projects iti pagilian nu saan a mapapigsa ti nasao nga special body.
Sigun kenni Atty.Domingo Egon Cayosa, dakkel a pagkapsutan ti nasao nga independent commission ti panaglusulos dagiti panel members daytoy ken dagiti agserbi koma nga imbestigador.
Patien ni Atty. Cayosa a dobdoble-in laeng ti ICI ti trabaho iti Office of the Ombudsman nga addaan iti dakdakkel a bileg no maipapan iti panangpaksyat iti korapsyon.
Innayon ti abogado a limitado laeng ti fact-finding ken recommendatory powers iti ICI rason a patienna a saan unay daytoy makapagtignay kontra iti anomalya kadagiti flood control projects.
Mamati pay daytoy a nasaysayaat nu ti Sandiganbayan ken daduma pay a korte ti mangituding kadagiti deadline tapno mapapartak ti panakaresolba ti kaso mainaig iti korapsyon iti pagilian.
Maipalagip nga immuna a naglusulos kas special adviser iti ICI ni Baguio City Mayor Benjamin Magalong ken sinaruno met daytoy ni commissioner Rogelio Singson bayat a kaudian a naglusulos ni commissioner Rossana Fajardo idi laeng napan a bulan.
