Marikriknan tunggal ngudo ti lawas ti nadagsen a gunay ti trapiko iti paset ti Botanical Garden kalpasan a nailukat daytoy iti publiko idi laeng napan a lawas.
Iti panakiuman ti Bombo Radyo kenni PLtCol Zacarias Dausen, dadaulo iti Traffic Enforcement Unit, nangipaiyulog ni Baguio City Police Office-City Director PCol. Ruel Tagel ti direktiba a mangituding kadagiti dedicated personnel ng agbantay ken agmonitor iti gunay ti trapiko iti paset ti Botanical Garden kasta metten iti Christmas Village idiay Baguio Country Club.
Malaksid iti dayta, naipaayan met ti augmentation dagiti personnel ti Police Station 3 manipod iti City Mobile Force Unit tapno tumulong iti panakaimanehar iti gunay ti trapiko iti nasao a lugar.
Mainaig iti dayta, dinakamat metlaeng ni PLt.Col.Dausen a mangrugrugi iti alas sais iti sardam a dumagdagsen ti gunay ti trapiko iti paset ti Botanical Garden bayat nga agpatpatingga daytoy iti alas nueve iti rabii gapu ta saan laeng a dagiti turista ti agar-aramat iti kalsada nu sadino, karaman metlaeng dita dagiti agawid ken agturong idiay Itogon, Tiptop area, Pacdal area ken dadduma pay a lugar.//Bombo Jez Lapizar
