BAGUIO CITY – Manarimaan iti clearing operation dagiti otoridad iti nakapasamakan ti rinnupak dagiti maikannigid a grupo kontra iti tropa ti 17th Infantry Battalion sadiay Apayao.
Maibasar iti report, nasurok kumurang 20 a myembro ti West Front Committee, Komiteng Probinsya Cagayan, Komiteng Rehiyon-Cagayan Valley nga idadauluan ni Edgar Bautista alyas Simoy ti nakarinnupak dagiti suldado sadiay Sitio Paco, Barangay Aurora, Pudtol, Apayao idi Hunyo 3, 2022.
Sigun iti militar, nagpaot iti 20 a minuto ti nasao a rinnupak.
Awan pay ti naipadamag a nadangran iti nasao nga engkwentro.Kabaytanna, nangipatungpal ti airstrike wenno bomb drop ti Philippine Air Force sadiay Sitio Magday, Upper Atok, Flora, Apayao kontra kadagiti Communist Terrorists Groups.
Manarimaan metleng ita ti panagwanawan dagiti kameng ti militar iti nasao a lugar para iti posible a casualty kadagiti terrorista a grupo
Iti agdama, naipatungpal metten ti nainget a checkpoints iti probinsya para iti posible a pannakatiliw dagiti timmaray a rebelde.
