BAGUIO CITY – Ad-adalen ita ti Benguet Provincial Board ti naingetan a regulasyon ken panaka-institutionalize ti clustering scheme iti panakaibiyahe dagiti nateng nga agtaud iti nagduduma a paset ti rehion kadagiti trading centers ditoy lokalidad.
Immunan a naadaptar ti nasao a sistema kabayatan ti community quarantine tapnu makontrol ti kaado dagiti tattao nga agturturong iti La Trinidad Vegetable Trading Post ken iti Benguet Agri-Pinoy Trading Center.
Nailanad iti singasing nga ordinansa ni Board Member Nestor Fongwan Jr. a maibilbilang iti Cluster 1 ti Buguias, Atok, Kabayan, Sablan, Itogon, La Trinidad ken Kapangan bayat a Cluster 2 ti Mankayan, Kibungan, Bakun, Tuba, Tublay ken Bokod.
Mairaman met iti Cluster 1 ti Bauko, Mountain Province bayat nga iti Cluster 2 ti Tinoc, Ifugao.
Maipalagip nga agbiyahe laeng dagiti karaman iti Cluster 1 tunggal Lunes, Miyerkules ken Biyernes bayat nga iti Cluster 2 ket tunggal Martes, Huwebes ken Sabado.
Nupay kasta, nakiddaw ti panakabaliw ti nabukel nga schedule gapu iti sumagmamano a pakaseknan dagiti stakeholders.
