Nasaysayaat a serbisyo para kadagiti atleta ken coaches iti Baguio City, manamnama inton 2026
Impanamnama ni Baguio City Councilor John Rey Mananeng ti nasaysayaat a serbisyo para kadagiti atleta iti siudad inton umay a tawen.
Sigun kenkuana, posible a maamyendaran ti sports code ti siudad.
Karaman pay kadagiti pagsayaatan a manamnama inton sumaruno a tawen ket ti panangbiruk ken panangsweldo ti lokal a gobyerno iti bukod a coaches dagiti atleta a makipaspaset iti Batang Pinoy.
Daytoy ket kalpasan a naduktalan iti konsultasyon nga adda dagiti gundaway a sabali ti coach dagiti atleta iti uneg ti pagadalan ken sabali manen ti coach dagitoy iti ruar.
Plano metlaeng ti siudad a mangipasdek iti sports clinic ken mangipasa iti ordinansa tapno mainstitutionalize ti combative sports festival.
Sigun pay kenni Mananeng, posible nga aggatang ti siudad iti shuttle wenno mini bus ken dua a van para iti sports office ken para kadagti transportation dagiti atleta ken coaches.
Ti pundo a maaramat iti pannakagatang dagiti nasao a kagawan ket manipud iti prizes ti siudad iti 2024 Batang Pinoy.
Malaksid iti daytoy, dadduma kadagiti batang pinoy athletes ti mapagasatan a maipaayan iti scholarship kadagiti unibersidad.
Immuna metten a kinuna ni Councilor Mananeng a manamnama a maipaay sakbay ti paskua ti 15,000 agingga 25,000 nga insentibo dagiti atleta ken coaches ti siudad a nakipaset iti Batang Pinoy ita a tawen.//Bombo Noveh Organo
