LA TRINIDAD, BENGUET – Makapadanag ti panagngato ti bilang dagiti indibidual a makapkaptan iti Human immunodeficiency virus (HIV) iti munisipyo ti La Trinidad sigun iti Municipal Health Services Offices.
Iti panakiuman ti Bombo Radyo kenni Clement Bilalat, Medical Officer 3 ti La Trinidad Municipal Health Services Offices, dumanonen iti 90 dagiti indibidual nga agsagsagaba iti HIV iti nasao a munisipyo.
Kinuna ni Bilalat nga idi napalabas a lima a tawen, ket agarup sangapulo wenno sangapulo ket dua ti mailislista a kaso ti HIV.
Nupay kasta,idi napalabas a tawen ket dumanon iti sangapulo ket innem a kaso ti nainayon iti bilang ti HIV sadiay La Trinidad.
Gapu iti dayta, nangipatungpal iti AIDS Candlelight Memorial Day ti Local Government Units ti munisipyo ti La Trinidad nga indauluan ti Municipal Health Services Office.
Ti nasao nga aktibidad ket naipatungpal babaen iti panangsindi iti kandila nga indauluan ni La Trinidad Mayor Romeo Salda ken dagiti dadduma a government workers iti nasao a munisipyo.
Iti nasao nga aktibidad ket panggep ti nasao a departamento nga ipalagip kadagiti umili a fatal wenno posible a mangitunda iti ipupusay ti maysa nga indibidual dagiti sexually transmitted infections.
Malaksid iti dayta a panggep ket inyunay-unay ni Bilalat nga agserbi daytoy nga aktibidad tapno maawan ti diskriminasyon kadagiti indibidual nga agpapasidong iti STI testing.
