BAGUIO CITY – Saanen a mapalubusan ti non-emergency cases a maiturong kadagiti nagduduma a pagagasan iti siudad ti Baguio nangruna no dagitoy ket nagtaud iti sabali a probinsia wenno rehion.
Sigun kenni Mayor Benjamin Magalong, saanen a basta-basta a makauneg iti siudad dagiti nasao a pasyente gaputa kasapulan nga ngalada nga umuna iti special arrangement sakbay a makaunegda iti Baguio.
Kinunana a kasapulan nga agala nga umuna dagiti maseknan iti certificate of acceptance iti pagagasan ditoy siudad a pagturunganda tapno mapalubusanda nga agpataming iti nasao a pagagasan.
Impaganetgetna a kasapulan a saan a mapunno ti bed capacity ti siudad kas panagsagana iti posible a panagado ti kaso ti COVID-19 gapu iti isasangbay ti Delta variant.
Maibasar iti datos, dumanon iti 879 ti total bed capacity dagiti isolastion facilities nga imatmaton ti city government.
Innayon pay ti mayor a panggepda a nayonan iti 150 beds ti kapasidad ti Santo Niño Hospital tapno ad-adu ti maaramat a kama iti kanito a kumaro ti sitwasyon ditoy lokalidad.
