![](https://img.bomboradyo.com/baguio/2021/05/taxi-baguio.jpg)
BAGUIO CITY – Nangrugin ti operasyon dagiti 200 a taxi units a nagbalin a kasukat dagiti 200 a nagpason a prangkisa dagiti taxi nga addaan biahe iti lokalidad.
Imbinglay daytoy ni Atty. Laird Dionel Urbanozo, Chief Transport Development Officer ti Land Transportation Franchising and Regulatory Board (LTFRB) – Cordillera iti panakiuman ti Bombo Radyo Baguio.
Sigun kenkuana, idi pay May 7 ti agdama a tawen a nangrugi ti operasyon dagiti nasao nga yunit ti taxi.
Kinunana a nakompleto dagiti maseknan a drivers ken operators dagiti kasapulan a dokumento ken naipasidongda iti inspeksion manipud iti ahensia.
Inlawlawagna nga idi Marso 24 ti agdama a tawen ket impaulog ti LTFRB Central Office ti direktiba iti LTFRB-Cordillera para iti panangpapartakda iti aplikasion dagiti maseknan a taxi units.
Impetteng pay ni Atty. Urbanozo a saan met nga aggigiddan ti panagbiyahe dagiti nasao a taxi units partikular ditoy Baguio City gapu iti pagalagadan iti panagbiage dagiti parapasahero a lugan.
Naminsan manen nga inlawalawagna a dagiti rimuar a taxi unit iti rehion ket sukat dagiti prangkisa a saan a nakapag-renew wenno naabandona a saan a nakatungpal iti intuding a paglintegan ti LTFRB.
Namnamaenda met latta nga ag-apela dagiti transport groups ken ti Baguio LGU a mangtubtubngar iti nasao nga addang.
Immunan a naibasura idi Enero 29 ti agdama a tawen ti petisyon dagitoy kontra iti nasao nga addang ti LTFRB.