BAGUIO CITY- Dinadael dagiti kameng ti Bakun MPS ti nasurok P1.5 million pesos ti gatadna a marijuana sadiay Bakun, Benguet.
Sigun kenni PCapt. Douglas Akistoy, dadaulo ti Bakun MPS, naipatungpal ti eradication operation iti kasulinekan a paset ti Barangay Kayapa.
Iti umuna nga operasyon, nadiskobre ti 2, 400 a pidaso ti mula a marijuana nga aggatad iti nasurok P1-M iti dua a plantation sites iti kabambantayan ti Sitio Mabilig.
Nasarakan metlaeng iti nasao a disso ti nasurok lima a kilo ti napagango a marijuana stalks.
Iti met maika-dua nga operasyon, nadiskobre ti nasurok 1,950 a pidaso ti fully grown marijuana plants nga aggatad iti P390,000 sadiay Sitio Lengyatan.
Agtultuloy ti imbestigasyon dagiti otoridad para iti panakatiliw dagiti cultivators.
