BAGUIO CITY – Agtultuloy ti nainget nga operasyon ti Benguet Police Provincial Office kontra iti panakatubngar dagiti aniaman a kita ti iligal a droga iti probinsiya.
Kasaruno daytoy ti panakadiskobre ti agarup 1,400 a pidaso ti fully grown marijuana plants bayat ti marijuana eradication idiay Sitio Lamagan, Kayapa, Bakun, Benguet idi Hunyo 16.
Mapatta-patta nga agbalor daytoy ti P280,000.
Awan ti natiliw a cultivator.
Sigun kenni PCol. Joseph Bayongasan, Provincial Director ti Benguet PPO, balligi ti nasao nga operasyon gapu iti nagtinnulong a puersa ti Bakun MPS, Provincial Drug Enforcement Unit/Provincial Intelligence Unit Benguet PPO, Regional Intelligence Unit-14 ken Philippine Drug Enforcement Agency-Cordillera.
Napadayawan dagiti operatiba gapu iti balligi nga operasyon ken nainget a kampanya dagitoy tapno malapdan ti panagwaras ti maiparit a mula wenno agas iti masakupanda a lugar.
