Dumanon iti P6.8 milion ti nakumpiskar a balor ti maatap a shabu manipod iti dua a High Value Individual babaen ti insayangkat ti RPDEU Cordillera a buy bust operation idiay Badiwan, Tuba, Benguet.
Ti suspek ket lalaki nga agtawen ti 43, alyas “Maminte,” ken babai nga agtawen ti 42, alyas “Ashley,” agassawa ken negosiante a residente ti Ipil-ipil Street, Muslim Compound, Barangat Looc, Calamba, Laguna.
Maibasar iti report ti pulisia, ti nakumpiskar a maatap a shabu ket nakakarga iti vacuum sealed transparent plastic sachet nga addaan ti QR Code ken addaan ti signature nga agkilkilo ti agarup 1kg nga agbalor ti Standard Drug Price a P6.8 milion.
Malaksid iti dayta, nakumpiskar metlaeng kadakuada ti maysa a pidaso ti genuine 1000 peso bill; 695 a pidaso ti 1000 peso bill boodle money; 187 a pidaso ti 500 peso bill boodle money; 1 a transparent sachet; maysa a pidaso ti green plastic nga addaan ti label; 1 a lugan ken dua a selpon.
Balligi a nakemmeg dagiti dua babaen ti nagtinnulong a puersa ti Regional Police Drug Enforcement Unit-Cordillera ken Police Provincial Drug Enforcement Unit-Benguet, Regional Intelligence Unit Division-Cordillera, Tuba MPS, LTMPS, PDEGSOU-Cordillera, ken dadduma pay a yunit ti pulisya.
Dagiti suspek ket agpada a sumangsango ti kaso a panaglabsing ti Section 5 ken 26 ti Article 2 ti RA 9165.
