Dumanonen iti P7.3 million a gatad ti imprastruktura ti koriente ti nadadael gapu iti epekto ti Tropical Storm Emong ken Habagat iti siudad ti Baguio ken probinsya ti Benguet.
Iti pannakaiuman ti Bombo Radyo kenni Laarni Ilagan, Community Relations Associate ti BENECO, kinunana a manipod iti nasao a bilang, P4.5 milion ket manipod iti siudad bayat a P2.7 milion ket iti probinsya ti Benguet.
Dagiti kangrunaan a nadadael ket dagiti primary holes, feeders ken dadduma pay.
Sigun kenni Ilagan, agtultuloy latta ti panagregget nga ar-aramiden dagiti kameng ti nasao a kooperatiba tapno maisubli ti suplay ti kuryente iti amin a barangay iti siudad ti Baguio ken probinsya ti Benguet.
Maibasar iti listaan, dumanon iti 99.6% ti na-restore a suplay ti koriente iti siudad ti Baguio, 81% idiay Atok; 89% idiay Itogon; 33.32% idiay Kapangan; 88.95 idiay Kibungan; 99.65 idiay La Trinidad; 100% idiay Mankayan; 95% idiay Sablan; 97% idiay Tuba; 58.93% idiay Tublay; 83.10% idiay Bakun, 92 idiay Bokod; 90.71% idiay Buguias; ken 92.41% idiay Kabayan, Benguet.
Inlawlawag ni Laarni a saanda nga ammo nu kaano a maisubli iti siento-por-seinto ti suplay ti kuryente gaputa nakabasar iti pannakadadael dagiti poste wenno feeder ti pannakaisubli daytoy.
Iti baet dayta, kinuna ni Laarni a 24/7 ti panagtrabaho dagiti kameng ti nasao a kooperatiba.
Imbinglay pay ni Laarni a kumpleto ti kangrunaan a kagawaanda a maar-aramat iti panangi-restore ti suplay ti koriente.
