![](https://img.bomboradyo.com/baguio/2022/01/P90-M-marijuana-tinglayan-kalinga-1.jpg)
BAGUIO CITY – Agtultuloy ti panangtutuk dagiti operatiba iti panakaparmek ti suplay ti iligal a droga, partikular ti marijuana ditoy rehion Cordillera.
Gapu iti daytoy, dumanon iti P90-M a gatad dagiti pinuon ti marijuan ti dinadael dagiti operatiba kadagiti barangay ti Loccong ken Butbut Proper sadiay Tinglayan, Kalinga idi kalman, January 19, 2022.
Naisayangkat ti marijuana eradication operation iti sidong ti COPLAN STORM BREAKER a nakadiskobrean dagiti iligal a mula manipud iti innem a pagmulaan.
Mapattapatta a 280,000 a puon dagiti dadakkel a marijuana ti pinarut ken inuram dagiti operatiba iti uppat a pagmulaan sadiay Barangay Loccong malaksid pay iti agarup nasurok 150 a kilo dagiti napagango a bulbulong ti marijuana.
Mapattapatta met nga 80,000 a puon dagiti dadakkel a marijuana ti pinarut ken inuram dagiti operatiba iti dua a pagmulaan sadiay Barangay Butbut Proper.
Nupay kasta, awan ti natiliw a cultivator kabayatan ti nagsina nga operasyon.
Inkari met dagiti otoridad ti agtultuloy a marijuana eradications ti nagduduma a drug enforcement agencies iti baet ti agdama a pandemya gaputa gungundawayan met dagiti marijuana cultivators ti agdama a sasaaden ti panawen gapu iti COVID-19.
![](https://img.bomboradyo.com/baguio/2022/01/P90-M-marijuana-tinglayan-kalinga-2.jpg)