BAGUIO CITY- Saan nga amin a drivers nga addaan ti lisensia ket awtomatiko wenno kwalipikado nga agnumar iti 10 year validity ti driver’s license.
Iti panakiuman ti Bombo Radyo Baguio, inlawlawag ni LTO-Cordillera Regional Director Francis Ray Almora, a dagiti laeng drivers a saan a naglablabsing iti linteg trapiko ti mabalin a maipaayan iti daytoy.
Dinakamatna a saan nga kwalipikado iti sangapulo a tawen a validity ti lisensia dagiti drivers a nakailista iti maysa wenno nasursurok pay a panaglabsing kadagiti linteg trapiko iti naglabas a lima a tawen.
Impettengna a prebilehiyo ti napa-attidog a validity ti lisensia kadagiti drivers nga awanan iti violation.
Nupay kasta, nasken latta nga agpaisidong iti medical check-up tunggal tallo a tawen dagiti drivers a kwalipikado iti daytoy tapno maipasigurado latta a natalged ti kondisionda nga agmaneho.
Impaganetget ni Almora a mabalin latta a masuspendir ti sangapulo a tawen a validity ti drivers license iti kanito nga aglabsing dagiti drivers nga agtagikua kadagitoy.
Tapno maliklikan daytoy, nasken nga agaplikar iti demurrage dagiti drivers nga addaan ti violation tapno maipaayanda iti intervention ken agtalinaed ti sangapulo a validity ti lisensia dagitoy.
