Nagpinirma ti pagilian a Pilipinas ken ti Singapore iti katulagan maipapan iti panakasalaknib dagiti Overseas Filipino Workers nangruna dagiti healthcare workers kasta met ti agreement maipapan iti kolaborasyon dagitoy iti climate financing.
Dagiti nasao a katulagan ket naiparang kalpasan ti bilateral meeting da President Ferdinand ”Bongbong” Marcos Jr. ken Singaporean President Tharman Shanmugaratnam idiay Malacañang Palace.
Ni President Shanmugaratnam ket adda iti pagilian a Pilipinas para iti tallo nga aldaw nga state visitna.
Sigun kenni Marcos Jr., ti Memorandum of Understanding maipapan ti Recruitment dagiti Filipino Healthcare Workers ket mangipasigurado a balanse ti pagkasapulan ti dua a pagilian iti sektor ti healthcare.
Impakaamona pay ti “Memorandum of Understanding for Collaboration on Carbon Credits” babaen ti Article 6 iti Paris Agreement iti nagbaetan ti Department of Environment and Natural Resources ken Ministry of Trade and Industry of the Republic of Singapore nga addaan panggep a mangkissay iti carbon footprint.
Para kenni President Shanmugaratnam, impaganetgetna ti kinaimportansya ti biodiversity a pakairamanan ti Philippine Eagle nga iti agdama ket mapukpukawen.
Kabayatanna, inyebkas ni Marcos Jr. a ti bilateral meeting dagitoy ket maysa nga oportunidad para iti panakapatibker ti relasyon ti dua a pagilian ken tapno mas mapasayaat pay ti masakbayan dagitoy.
