BAGUIO CITY – Dumanon iti 3,000 nga indibidual manipud kadagiti narisgo a sektor ti puntirya ti lokal a gobierno ti siudad ti Baguio a maipasidong iti expanded testing para iti COVID-19 manipud ita nga aldaw, September 17 agingga inton Sabado, September 19.
Sigun kennu Mayor Benjamin Magalong, manipod iti nasao a bilang ket 1,000 ti agtaud iti La Trinidad, Itogon, Sablan, Tuba and Tublay (LISTT) Area bayat a ti 2,000 ket manipud ditoy siudad.
Kinunana a mapunpuntirya metlaeng ti panakaipatungpal ti 1,000 a testing iti innaldaw.
Dinakamatna nga ita nga aldaw ken inton Sabado ti schedule ti COVID test dagiti maseknan nga indibidual ditoy Baguii bayat nga inton Biyernes ti schedule ti LISST Area.
Agtaud ti pondo a maaramat para iti nasao a testing iti Bases Conversion and Development Authority (BCDA).
Sigun kenni Magalong, kalpasan ti umuna a rikos ti COVID testing idi napalabas a bulan ket kiniddawna ti panangiraman ti BCDA iti LISTT Area.
Paset daytoy ti inisyatibo ti Baguio LGU nga ilak-am dagiti kabangibang a lugar daytoy iti epektibo a panagresponde ti siudad iti COVID-19. (report ni Bombo Brigit Marcasi)
