Insumitiren ni Senator Francis “Chiz” Escudero ti manifestation daytoy iti Commission on Elections (Comelec) maipapan iti naawatna a ₱30 million campaign donation manipod kenni Lawrence Lubiano, maysa a government contractor ken agtagikua iti Centerways Construction and Development.
Nupay kasta, saan pay nga imbinglay ni Comelec Chairman Atty.George Erwin Garcia ti linaon ti insumitir ni Senator Escudero.
Mainaig iti dayta, kinumpirmar met ti legal counsel ti senador a ni Atty. Ramon Esguerra nga impiladan ti pormal a sungbatda iti poll body seknan iti nasao nga alegasyon.
Sigun kenni Esguerra, ti naawat ni Senator Escudero a donasyon ket ligal, fully declared, ken nagtulnog iti long-standing practice nu sadino, kumpiansa daytoy nga awan ti makita ti poll body a nagbasulanda.
Maipalagip a ti kontraktor a ni Lubiano ket nangidonar para iti mapapati a senatorial campaign ni Chiz Escudero iti 2022 elections.
Immuna metten nga impakaammo ni Atty.Garcia nga immatendar ti abogado ni Lubiano iti naangay a panagdengngeg iti Comelec ken nangisumitir kadagiti dokumento ken pammalawag seknan iti panakaipaay ti nasao a donasyon.
