Impetteng ni Atty. Cristy Locaben a maysa kadagiti kangrunaan a rason iti saan a panangireport dagiti maab-abuso nga indibidual iti rehion Cordillera kadagiti otoridad iti sasaaden dagitoy ket gapu iti panagbain.
Iti pannakiuman ti Bombo Radyo kenkuana, kinunana a daytoy ti naobserbaranda a maysa kadagiti rason gaputa mabain dagiti mabikbiktima iti panag-abuso a maamuan a dagitoy ket biktima iti nasao a banag.
Malaksid iti dayta, ket saanda nga ammo a dagitoy ket maab-abuso wenno ab-abusuen dagiti partner-da gaputa pagarup dagitoy a normal laeng, kasta metten nga awan ti talekda kadagiti barangay officials.
Sigun kenni Atty. Locaben, awan ti panagtalek dagiti sumagmamano a biktima iti panag-abuso kadagiti opisyales gaputa maamakda a maiwaras ti sasaaden dagitoy.
Impetteng pay ni Atty. Locaben nga awan ti agkidkiddaw iti tulong kadagiti barangay officials agsipud ta adda dagiti sumagmamano nga opisyal a kurang ti panagsanayda iti nasao a banag, rason a saanda nga ammo a solbaren daytoy.
Kabayatanna, innayonna nga iti kanito a makapasar iti panag-abuso ket mabalin laeng nga agpatulong kadagiti barangay officials, iti Philippine National Police ken iti Department of Social Welfare and Development.
