LA TRINIDAD, BENGUET – Namnamaen dagiti residente sadiay Pines Park, Lubas, Balili, Tawang ken sumagmamano a paset ti Ambiong a dagus a mailukat ti Pines Park bridge iti kabiitan a panawen.
Kasaruno daytoy ti panakaiparikepna kalpasan ti uppat nga aldaw a pannakailukat daytoy bayat ti holyweek.
Sigun kadagiti otoridad a nakaduty ken kadagiti residente, awan pay ti naipakammo kadakuada seknan iti panaglukat manen ti nasao a rangtay para kadagiti motorista gapu ta agtaltalinaed a nabarikadaan dagitoy.
Nupay kasta, silulukat ladta daytoy a pagnaan dagiti residente.
Iti interview ti Bombo Radyo kenni PCapt. Allan Minong Piloy, Police Community Precinct 1 Commander, maysa a pakaseknanda ti aksidente a mabalin nga itunda dagiti cable wires a nakauy-oy wenno magaw-at dagiti lumabas.
Gapu iti dayta, namnamaenda a makasarita dagiti opisyales ti maseknan a barangay kasta met dagiti inhinyero ti nasao a rangtay maipapaan iti nasao a pakaseknan.
Maipalagip a nailukat para kadagiti light vehicles ti nasao a rangtay bayat ti holyweek ngem dagus a naiparikep daytoy.//Bombo Jez Lapizar
