BAGUIO CITY – Balballakadan ti lokal a gobierno dagiti residente ti Baguio City a mamati a kualipikado dagitoy iti Social Amelioration Program (SAP) nga agturongda iti barangay hall dagitoy ita nga aldaw tapno agpalistada iti nasao a programa.
Kagiddan iti daytoy ti pagleppas ita nga aldaw ti uppat nga aldaw a pawayway a naipaay kadagiti lokal a gobierno a mangileppas iti pannakaiwaras dagiti tulong pinansial iti sidong ti SAP.
Sigun kenni Mayor Benjamin Magalong, masapul a siguraduen dagiti opisial ti barangay a nakalukat ti barangay hall dagitoy ita nga aldaw.
Kinunana a daytoy ket tapno maakomodar dagiti residente nga agtartarigagay iti nasao a programa.
Kiniddaw pay ti mayor ti panaganus dagiti opisial ti barangay iti manamnama a panagturong ti adu a residente kadagiti barangay hall.
Naipaayan ti siudad ti Baguio iti 45,000 nga slots iti SAP ngem agingga iti agdama ket adda pay ti 10,000 a bakante nga slots para kadagiti posible a benepisario.
