BAGUIO CITY – Manamnama a marugian ti panagbiahe dagiti UV Express vans paruar ken pauneg ditoy siudad ti Baguio ita a lawas.
Sigun kenni LTFRB-Cordillera regional director Engr. Lalaine Sobremonte, ur-urayenda laengen ti pammalubos ti LTFRB Central Office iti panagbiahe dagiti UV Express vans a nagaplikar para iti ruta a Baguio-Cabanatuan; Baguio-Lingayen ken Baguio-San Carlos, Pangasinan.
Mangnamnama daytoy a maipaayen ti kasapulan a pammalubos inton bigat, December 28 tapnu agbiahen dagiti maseknan nga yunit ti UV Express vans.
Innayonna nga ipalpalpas metten dagiti operators ti panagsaganada para iti panagrugi ti biahe dagitoy.
Dinakamatna metlaeng a no anya dagiti pagaladagan iti operasyon dagiti bus a napalubusan nga agbiahe ket isu metlaeng ti masurot iti operasyon dagiti UV Express vans, pakairamanan ti limitasyon a walo laeng nga yunit ti mapalubusan nga agbiahe ken adda ti maituding nga schedule iti panagbiahe dagitoy.
Impetteng ni Engr. Sobremonte a dakkel ti maipaay a serbisyo dagiti UV Express vans kadagiti pasahero no agrugin ti panagbiahe dagitoy.
