BAGUIO CITY – Agtaltalinaed a natalged a lugar a pagnaedan, pagtrabahuan ken pagnegosyo-an ti rehion Cordillera.
Impannakkel daytoy ti Police Regional Office Cordillera (PROCOR) iti naangay a First Quarter 2022 Regional Peace and Order Council Meeting.
Maibasar iti rekord ti PROCOR, bimmaba ti bilang dagiti krimen a nailista iti rehion iti 13 percent idi napalabas a tawen manipud iti datus a nailista idi 2020.
Naamuan nga iti 2021 ket nasurok iti 3,000 ti pakabuklan a kaso dagiti krimen iti Cordilleras bayat nga idi 2020 ket nasurok iti 3,500 a kaso.
Impannakkel ti PROCOR nga iti 2021 ket agarup iti 1,700 a wanted persons ti rehion ti natiliw, pakairamanan ti 400 nga adda iti listaan dagiti most wanted persons.
Dakkel met ti naaramidan ti PROCOR iti kampanya kontra iti iligal a droga gapu iti naisayangkatda a 621 nga anti-illegal drug operations a nagresulta iti panakatiliw ti 541 a drug personalities ken panakakumpiskar ti agarup P1.57-B a gatad ti iligal a droga.
Impannakkel pay ti PROCOR ti dakkel a naaramidanda iti kampanya kontra iti panagrebelde babaen iti panakatiliw ti siyam a personalidad nga addaan ti warrants of arrest ken 328 a personalidad, underground mass organization ken supporters ti rebelde a grupo.
