BAGUIO CITY – Nagtaripnong ti LTFRB-Cordillera ken ti lokal a gobyerno ti Baguio mainaig iti panakaikkat dagiti plastic barriers kadagiti parapasahero a jeep ditoy siudad.
Sigun kenni Engr. Lalaine Sobremonte, regional director ti LTFRB-CAR, kiniddaw ti city government a mapagtalinaed ti 70% seating capacity WITH plastic barriers kadagiti PUJs.
Gapu iti daytoy, ur-urayenda ti pormal a surat ti city government iti nasao a kiddaw para iti panakaiyendorsona iti central office ti LTFRB.
Maipalagip nga iti waragawag ti LTFRB ket ita nga aldaw ti panagrugi ti panakaikkat dagiti plastic barriers kadagiti parapasahero a jeep.
Iti panagrikos ti Bombo Radyo Baguio News Team, naobserbaran ti panagikkat ti sumagmamano a drivers iti plastic barrier kadagiti jeep dagitoy.
