BAGUIO CITY – Linawlawagan ti Station 3 ti Baguio City Police Offce nga aksidente ti panakabuong ti sarming a ridaw iti opisina ti Beneco sadiay South Drive idi kalman a maatap a pinwersa a linukatan ni Beneco BOD Rocky Aliping ken ti kaduana.
Daytoy ket sigun iti interview ti Bombo Radyo Baguio kenni Pol/Capt. Rodulfo Serran, station commander ti nasao nga estasyon ti pulisya.
Immuna iti daytoy, kinunana a naireklamo iti opisinada iti kaso a malicious mischief ni Beneco BOD Aliping ken ti kaduana a saan a nabigbig a lalaki gapu iti maatap a panangpilitda a manglukat iti sarming a ridaw iti opisina ti Beneco a nangitunda iti panakabuongna.
Iti reklamo iti pulisya ni Roy Palos Olastic , maysa nga empleyado ti BENECO, ginandat ni Aliping ken ti kakaduana a sumrek iti opisina ti BENECO iti baet a nakarikep daytoy gapu iti nainget a working scheme nga ipatpatungpal ti nasao nga kooperatiba sipud pay itay kanikadua gapu iti ngumatngato a kaso ti COVID-19.
Maibasar iti BENECO Advisory 2021-28 a napetsaan idi Setyembre 26, ti laeng Consumer Welfare Desk ken Collection Center ti nakalukat para kadagiti member-consumers bayat a dagiti dadduma nga opisina ket para laeng kadagiti maseknan nga empleado.
Nupay kasta, maatap a ginandat ti kadua ni BOD Aliping a luktan ti makinngato a tranka ti main door babaen iti panagaramatna iti master key ngem saan a maluktan daytoy.
Gapu iti daytoy, maatap a pinilit ni Aliping a luktan daytoy a nangitunda iti panakabuong ti sarming a ridaw.
Kinuna met ni Pol. Capt. Serran nga kadagitoy a gundaway ket awan ti kaso a napila iti nasao nga insidente.
