Intuding ti committee on justice ti Kamara ti February 2 a rugi iti panakadengngeg ti naipila nga impeachment complaint kontra kenni President Ferdinand Marcos Jr.
Maangay daytoy iti People’s Center wenno ti pasdek iti Batasang Pambansa complex a sigud a pakaang-angayan iti quad committee hearings.
Manamnama a matingiting iti nasao a panagdengngeg dagiti immuna a dua nga impeachment complaints a naipila partikular ti reklamo ni Andre de Jesus nga inyendorso ni Pusong Pinoy Party-list Rep. Jernie Jett Nisay idi January 19, ken ti impila ti Makabayan Coalition nga inyendorso met da ACT Teachers party-list Representative Antonio Tinio, Gabriela party-list Representative Sarah Elago,ken Kabataan party-list Representative Renee Co.
Kabayatanna,immuna metten nga imbinglay dagiti sumangmamano a manmanday-linteg a ti impeachment complaint nga impila ni de Jesus ket nakapoy nu sadino,kinuna ni Caloocan Representative Edgar Erice a posible a nalaka laeng daytoy a madismisar gapu iti kinakurang ti form ken substance.
Maipalagip nga iti impila ni de Jesus a reklamo ket nailanad ti innem a grounds para iti impeachment kas iti panaglabsing iti Konstitusyon, graft and corruption, ken ti betrayal of public trust.
