BAGUIO CITY – Pagyamyamanan ni Benguet Governor Melchor Diclas ti agtultuloy a panagsangpet dagiti donasyon a personal protective equipment (PPEs) para kadagiti frontliners ti probinsia iti kampanya kontra iti COVID-19.
Iti interview ti Bombo Radyo, kinunana a kaudian ti P2.5-M nga indonar ti PCSO para iti Benguet General Hospital (BeGH) a para iti laban kontra iti nasao a sakit.
Sigun kenkuana, aramatenda ti pondo a panggatang iti ventilator ken dadduma a PPEs.
Dinakamatna nga innaldaw nga adu a persons under investigation (PUIs) ken persons under monitoring (PUMs) ti bambantayan dagiti frontliners malaksid pay iti dumanon 28 a persons under investigation nga adda ita iti BeGH.
Iti agdama, agarup 1,800 ti PUMs iti Benguet bayat a nasurok 600 dagiti PUIs.
Impanamnama pay ni Governor Diclas a kabaelan ti BeGH a maka-akomodar iti 50 a PUIs nupay inaklonna a parikut no umado nga umado dagiti nasao a pasyente.
Sigun kenkuana, nagpirman iti katulagan ti provincial government ti Benguet ken ti Benguet State University para iti panagserbi kas offsite quarantine ti probinsia ti maysa a dormitoryo ti unibersidad.
Dinakamatna a maisagsaganan ti nasao a pasdek ken sadiay a maiturong dagiti PUIs a kasapulan a ma-admit ken makitaan ti mild symptoms ti COVID-19.
Ur-urayenda laengen ti panagpirma ti CHED iti nasao a katulagan kas mangiwanwanwan kadagiti state universities and colleges.
Kabayatanna, nagserbi nga sponsor ti Association of Cordillera Contractors Organized for Regional Development iti panakaipasdek ti dialysis processing area iti BeGH covered court para iti panaka-akomodar dagiti PUIs ti COVID-19 a maipaspasidong iti dialysis.
